Pasyuna

Free Web Hosting Provider - Web Hosting - E-commerce - High Speed Internet - Free Web Page

Bisozy 1:7 ta ¡§Khazohpa china he sona thaby a châ¡¨ tahpa maniah chho ta. ¡§Sona¡¨ tahpa yzie cha Khazohpa khozie hawhta a siapa nata a pathaih kawpa ta hropa he a châ. Bisozy ta, sona cha ngôh nata tâkâ hlata tlaichhai via awpa a châ zie maniah a chho hra (Bisozy 3:13-14). Biehrai Thiehpa chhao ta Zisu Krista cha ¡§ vârâh tawhta sona a zupa¡¨ a châpa ta maniah chho hra ta (1 Kawrini 1:30). He sona he degree hluhpi daopa vata topa châ leipa ta Khazohpa china vata topa tlao a châ hri. ¡§Khazohpa chi¡¨ tahpa yzie cha Khazohpa za ta, eima beipa ta hnei ta, a biepiepazy zypa he a châ. Khazohpa a chi leipazy cha a hrupazy châ ei ta; he a hrupazy heta sona nata padona zy a hao ei ta (Bisozy 1:22; 12:1), a ei a chhiapa he ama rai chaipa ta hmâhpa ta hiehâh ruchhôpa ta y tyh ei ta ( Bisozy 20:3; 29:11), khizaw hmozy chadai ei ta (Bisozy 29:32), Khazohpa liata a pahnieh ta a khozie hawhta sie châpa ta sasyh a ngâ ei ta amo kho dâh hawhta ama sie tyh (Bisozy 28:26). Khizaw liata châ a thaipa hluhpi nata hneiropa hluhpizy ta he Khazohpa china vata topa sona he ama hnei lei no ta, keimo eima hnei theipa nata a hnei thei awpa duahmo liata eima ypa he, Khazohpa byhna sôh ngaitapa a châ hmeihseih. Chavata Mara sikuhati zydua Khazohpa china chô ta eima chu lyma awpa he tao awpa pha chaipa a châ. ¡§Sona he degree hluhpi daopa vata topa châ vei¡¨ ei tah no ta, degree hluhpi daopa he phahnai vei ei tahna châ tiah râh leipa ta, Khazohpa china chô ta a chu ta, Marapasawzy thaina chi nanopazy eima paki awpa ei reina tlao a châ hri.

He Kazohpa china vata nata china chô ta daopa sona he ta keimo mopakha maniah padua aw ta, eima chhôhkha, khih nata tlâh nata râh chhao maniah a padua hra aw. Eikha cha Taiwan liata company chhituhpa pakha ¡§Taiwan rah a hmasiena chhâpa he khâpa ma a châ chai?¡¨ tahpa ta hiahri na ta, he hawhta einâ chhy. ¡§Thaina chi nanopa a chu awpa ta sikuhati hluhpi tuah pi ta, cha sikuhatizy cha ta ama patlô tawhta eima râh lâ vaw kua ei ta, ama thainazy cha hmâpa ta eima râh he maniah ama siekhei. He he hmah maniah a pasiesatuhpa cha a châ¡¨ a tah. Maraland sikuhatizy chhao eimâ chuna chhâpa eima panano lei khiata cha, Maraland heta a hmialâ (future) awpa hnei hluh vei. Sawhkha rai hria awpa vâ ta nata politician châ awpa vata tlâ eima chu thlah ha awpa châ leipa ta, khâpa hmo phapa nata thiehpa tlyma keimo châ nata eima râh châta hmô papua awpata a chu awpa daihti a châ ha ba. Pakhona ta, ¡§ Siaha liata dyh khazie ma TV a hnei ha bâ ei?¡¨ tahpa dei châ khao leipa ta, ¡§Marapasaw pakhazie ma TV a tao thai ha bâ ei?¡¨ tahpa lâ a ngia eimâ chhuah bâna daihti a cha habapa ta ei pahno. Sawhkha rai hria awpa vata tlyma, MDC and MLA châ awpa vata tlyma deita ta eimâ chu thlah ha khiata cha sawhkha rai hria awpa nata politics su ruapa a y khao leina daihti vaw tlô aw ta, hria khohpa nata hria thaipa hnei leipa ta tlao eima viavi thlah ha aw.Chavata Monyuhnah ta "job oriented" ama tahpa nata "vocational skills" (eima chuna kao ta rai maniah a taopa awpa)ama tahpa zy, science nata technology, industry, etc, course la chhah he Mara sikuhatizy ta eima paha pathao awpa a peimawh hmeihseih.

Eima nôpaw nata chhôhkhazy ta phusa tâkâ thata pahryuhpa ta maniah pachusa ei ta, chavata ngâchhih ngaitapa nata tiama ngaitapa ta eima chu khai awpa ta Mara sikuhati zydua eima pasyu khai. Eima chu hmeihseih khiata cha eima thai thei lei awpa y vei. Marapasaw eima lathlie chhie tiah râh vei. Hlaotloh leipa ta eima râh lâ a lie awpa he phusa eima pahryuh thlâhthlipa a châ tho ta, noza chhih kawpa hmo châ ta, chavata Mara sikuhati zydua hlaotloh cheingei eimâ chhuah khai awpa ta eimâ pasyu hra. Beipa ta Mara sikuhatizy nata Maraland byhna maniah pie se.

KHAZOHPA CHINA HE SONA THABY A CHA

Laiu Fachhai